වැලිවේරිය රතුපස්වල පිහිටි හේලීස් සමාගමට අනුබද්ධ අත්වැසුම් කම්හලෙන් ඉවතදමන
ලද රසායනික ද්‍රව්‍යවල බලපෑම හේතුවෙන් රතුපස්වල ප්‍රදේශයේ මහජනතාව පානයට සහ පාරිභෝජනයට
ගන්නා ජලය අපිරිසිදු වී ඇත. එම හේතුවෙන් මහත් අපහසුතාවයට පත් ජනතාව මේ සබැඳිව අදාල
වගකිවයුතු පාර්ශවයන් වෙතින් කරන ලද ඉල්ලීම් වලට කිසිදු ප්‍රථිචාරයක් නොලැබීම
හේතුවෙන් දින ගණනාවක් තිස්සේ විරෝධතා ව්‍යාපාරයන් ආරම්භ කරන ලදි.
අදාල විරෝධතාවයන් ගමනාගමන කටයුතුවලට සහ අනෙකුත් පාලන කටයුතු වලට අවහිරවන
අයුරින් පැවැත්වීම හේතුවෙන් එය මැඩපැවැත්වීම සඳහා පොලීසිය යෙදවීමට ද සිදු වී ඇත.
කෝපාවේශ වූ මහජනයා මැඩපැවැත්වීම පොලීසියේ මැදිහත්වීමෙන් කල නොහැකි තත්වයමත යුද්ධ
හමුදා නිළධාරීන්ද කැඳවා ඇත.
කොළඹ නුවර ප්‍රධාන මාර්ගය අවහිර වනසේ උද්ඝෝෂණයේ යෙදුණු අයවළුන් විසුරුවා
හැරීමට පොලීසිය විසින් කඳුළු ගෑස් සහ ජල ප්‍රහාර එල්ල කර ඇත.
ඇතිවී ඇති නොසන්සුන්කාරී තත්වය හේතුවෙන් වයස අවුරුදු 30 ක පමණ පුද්ගලයකු
මියගොස් ඇති අතර, 20 දෙනෙකු පමණ තුවාල ලබා ප්‍රථිකාර ලබන බවට රෝහල් ආරංචි මාර්ග
පවසා ඇත.
ආරක්ෂක හා නාගරික සංවර්ධන අමාත්‍යාංශයේ ලේකම් ගෝඨාභය රාජපක්ෂ මහතා සහ මෙම
ප්‍රදේශයේ නියේජිතයන් අතර ඇතිවූ සාකච්ඡාවෙන් අනතුරුව එම කර්මාන්තශාලාව සති 02 ක පමණ
කාලයකට තාවකාලිකව වසා දමන ලදි.
අදාල කර්මාන්තශාලාවේ අපද්‍රව්‍යන්ගෙන් ජලය අපවිත්‍රවී ඇති බව තහවුරු
කරගැනීම සඳහා අදාල පාර්ශවයන් විසින් ජල සාම්පල පරීක්ෂණ කටයුතු මේවන විට ආරම්භ කර
ඇත.කෙසේවුවද සති 06 ක් තුලදී නව ජලපද්ධතියක් සකස්කරදෙනතුරු බවුසර වලින් ජලය බෙදා
හැරීමට කටයුතු සකසා ඇත.
